• ᐊᖏᕐᕋᖓ
• ᐅᑭᐅᖅᑕᖅᑐᕐᒥ ᐃᖃᓗᒃᓯᐅᖅᑎᑦ ᑲᑐᔾᔨᖃᑎᒋᒃᑯᖏᑦ
  • ᐊᑐᖅᓯᒪᔪᑦ ᓯᕗᓂᐊᓂ
  • ᓇᖕᒥᓂᑲᖅᑐᑦ ᐃᒪᓐᓇ
  • ᐋᖅᑭᐅᒪᓂᖅ
  • ᐃᖃᓗᒃᑕᐅᔪᓐᓇᖅᑐᑦ ᐅᓄᖕᓂᖏᑦ
  • ᑲᑐᔾᔨᖃᑎᒌᒃᖢᑎᒃ ᐱᓕᕆᐊᖑᔪᑦ ᐊᖏᕈᑦᑏᑦ
  • ᓄᓇᓖᑦ
• ᐃᓄᐃᑦ
  • ᑲᑎᒪᔩᑦ
  • ᐊᐅᓚᑦᑎᔨᐅᔪᑦ
  • ᓄᓇᓕᒃᓂ ᑐᓴᐅᒪᑎᑦᑎᔩᑦ
• ᐅᒥᐊᑦ
  • ᐅᒥᐊᑉ ᐊᖅᑯᑎᐊᓂᒃ ᖃᐅᔨᓴᐅᑎ
• ᐱᕙᓪᓕᐊᔭᖏᑦ
• ᐱᓕᓪᓕᐊᔪᑦ ᐱᓕᕆᐊᑦ
• ᐃᖅᑲᓇᐃᔭᖅᑕᒍᔪᓐᓇᖅᑐᑦ

ᐱᕙᓪᓕᐊᔪᑦ ᐱᓕᕆᐊᑦ

ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᐱᒋᐊᑎᑕᐅᓚᐅᕐᓯᒪᔪᖅ ᑕᑯᖑᐊᕐᓂᖃᕐᖢᑎᒃ ᐱᓪᓚᑦᑕᖑᔪᒃᑯᑦ ᐃᑲᔪᑎᑕᖃᖁᓪᓗᒍ ᓄᓇᕘᒥᐅᓄᑦ ᐃᖃᓗᒐᓱᒃᓂᕐᒧᑦ ᐊᒻᒪᓗ ᐃᓄᖏᓐᓄᑦ ᐱᖁᑎᖃᕐᑎᐅᔪᓄᑦ ᓄᓇᓕᖏᓐᓄᑦ, ᐊᒻᒪᓗ ᓄᓇᕘᒥᐅᑕᓕᒫᓄᑦ. ᑕᑯᖑᐊᕐᓂᖓ ᐱᓇᓱᒃᖢᒍ, ᐃᑲᔪᕐᑎᒌᒃᓂᒃᑯᑦ ᐊᐅᓚᓂᖓ ᐃᖃᓇᐃᔭᑎᒋᔭᐅᓪᓗᑎᒃ ᐊᖑᓇᓱᒃᑐᓕᕆᔨᒃᑯᑦ ᑲᑎᒪᔨᖏᑦ ᐊᒻᒪᓗ ᓄᓇᓕᒃᓂ ᐸᐸᑦᑎᔩᑦ ᓇᓗᓇᐃᕐᓯᖃᑦᑕᕐᖢᑎᒃ ᐱᓕᕆᐊᖑᔪᓐᓇᕐᑐᓂᒃ ᐃᓄᓯᖏᓐᓄᑦ ᑮᓇᐅᔭᒃᓴᕐᓂᒃᑯᓪᓗ ᐱᔭᐅᔪᓐᓇᕐᑐᓂᒃ, ᐃᒃᐱᐊᕐᔪᒃ, ᖃᐅᓱᐃᑦᑐᖅ, ᐊᐅᓱᐃᑦᑐᖅ ᐊᒻᒪᓗ ᕿᑭᕐᑕᕐᔪᐊᖅ. ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᐃᑲᔪᖃᑦᑕᕐᑐᑦ ᐱᖁᑎᖃᕐᑎᐅᔪᓂᒃ ᓄᓇᓕᒃᓂᒃ ᐊᑐᓕᕐᑎᑦᑎᓇᓱᒃᑎᓪᓗᒋᑦ ᐱᓕᕆᐊᖑᔪᒪᔪᓂᒃ ᑮᓇᐅᔭᑎᒍ, ᐊᐅᓚᑕᐅᓂᖏᑎᒍ ᐊᒻᒪᓗ ᐃᖃᓗᓕᕆᓂᕐᒥᒃ ᖃᐅᔨᒪᓂᖏᑎᒍᑦ.

ᑕᑯᓕᒫᕐᖢᒍ, ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᐱᖁᑎᖃᕐᑎᐅᔪᑦ ᓄᓇᓕᖏᑦ ᓂᕈᐊᕐᓯᓯᒪᒃᒪᑕ ᑲᑎᑦᑎᕙᓪᓕᐊᔪᒪᓪᓗᑎᒃ ᕿᓚᒻᒥᐅᔪᒃᑯᑦ ᐊᑯᓂᐅᔪᒧᓪᓗ ᐱᓕᕆᐊᖑᔪᓐᓇᕐᑐᓂᒃ. ᕿᓚᒻᒥᐅᔪᒃᑯᑦ ᐱᓕᕆᐊᖑᔪᓐᓇᕐᑐᑦ ᑲᔪᓯᕙᓪᓕᐊᖏᓐᓇᕐᑐᑦ ᐊᒻᒪᓗ ᒫᓐᓇ ᐱᔭᕆᐊᓕᒃᓂᒃ ᐱᖃᑦᑕᕐᖢᑎᒃ ᓂᕿᒃᓴᖃᑦᑎᐊᖏᓐᓂᕐᒧᑦ, ᐊᑯᓂᐅᔪᒧᑦ ᐱᓕᕆᐊᖑᔪᑦ ᓲᕐᓗ ᓄᓇᓕᒃᓂ ᐱᖁᑎᒋᔭᖏᑦ ᑮᓇᐅᔭᒃᓴᐅᑕᐅᔪᓐᓇᕐᑐᓪᓗ.

ᓂᑭᒃᓴᖃᑦᑎᐊᖏᓐᓂᖅ

ᐊᐅᔭᑕᒫᑦ, ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᓂᐅᕕᖃᑦᑕᕐᑐᑦ ᓂᕿᓂᒃ ᐊᒻᒪᓗ ᐊᖑᓇᓱᒃᑎᓄᑦ ᐱᖁᑎᒃᓴᖏᓐᓂᒃ ᐊᑭᑭᑦᑐᓂᒃ ᓂᐅᕙᐅᓐᓛᒥᑦ, ᐱᔪᒪᓂᖏᑦ ᒪᓕᒃᖢᒋᑦ ᓄᓇᓖᑦ. ᑭᕕᐅᖅ ᐅᓯᓕᕐᓱᖃᑦᑕᕐᑐᖅ ᐊᒻᒪᓗ ᑎᑭᐅᔾᔨᕙᒃᖢᓂ ᓄᓇᓕᒃᓄᑦ. ᓂᐅᕈᑕᐅᕙᒃᖢᑎᒃᓗ ᓄᓇᓕᒃᓂ.

ᑕᒃᑯᐊ ᐅᓯᔭᐅᓂᖏᑦ ᐃᑲᔫᑎᖃᑦᑕᕐᑐᑦ ᓂᕿᒃᓴᖃᑦᑎᐊᖏᓐᓂᕐᒧᑦ. ᐱᔾᔪᑎᒋᓪᓗᒍ ᓂᖀᑦ ᐱᖁᑏᓪᓗ ᖃᖓᑕᓲᒃᑯᑦ ᐅᕙᓘᓐᓃᑦ ᐅᒥᐊᕐᔪᐊᒃᑯᑦ ᑎᑭᑎᑕᐅᖃᑦᑕᕐᓂᖏᓐᓄᑦ ᐊᑭᑐᔫᖃᑦᑕᕐᒪᑕ, ᐱᓗᐊᕐᑐᒥᒃ ᖁᑦᑎᒃᑐᕐᒥᐅᓄᑦ. ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᐅᓯᖃᑦᑕᕐᓂᖏᑦ ᐊᑐᖏᓐᓂᕐᓴᐅᑎᑦᑎᕗᑦ ᐃᓄᖏᓐᓂᒃ ᓄᓇᓕᒃᓂ, ᐊᑭᑦᑐᕆᐊᕐᓯᒪᖃᑦᑕᖏᒻᒪᑕ ᐅᕙᓘᓐᓃᑦ ᐅᓯᔭᐅᔾᔪᑎᖃᖃᑦᑕᖏᒻᒪᑕ. ᖃᐅᔨᒋᐊᕐᑕᐅᒐᒥ ᐊᕋᒍᖓᓂ 2014, ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᐃᑲᔪᓚᐅᕐᑐᑦ ᑎᓴᒪᐅᔪᓂᒃ ᓄᓇᓕᐅᔪᓂᒃ ᐊᑭᓕᖏᓐᓂᕐᓴᐅᓪᓗᑎᒃ $500,000 ᖃᖓᑦᑕᐅᑎᓄᑦ ᐅᓯᔭᐅᔾᔪᑎᓄᓪᓗ.

ᐊᒻᒪᓗᑦᑕᐅᖅ, ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᐃᖃᓇᐃᔭᖃᑎᖃᕐᑐᑦ ᐱᖁᑎᖃᕐᑎᐅᔪᓂᒃ ᓄᓇᓕᐅᔪᓂᒃ ᓂᕿᓪᓚᑦᑖᓂᒃ ᐱᑎᑦᑎᓇᓱᒃᖢᑎᒃ. ᓲᕐᓗ, ᑭᕕᐅᖅ ᐅᓯᖃᑦᑕᕐᑐᖅ ᐊᖑᓇᓱᒃᑎᓂᒃ ᐱᖁᑎᒋᔭᖏᓐᓂᒃᓗ ᕿᑭᕐᑕᒧᑦ ᐊᐅᔭᒃᑯᑦ ᑐᒃᑐᒐᓱᒃᖢᑎᒃ ᐅᕙᓘᓐᓃᒃᑦ ᐅᒥᒃᒪᒐᓱᒃᖢᑎᒃ. ᑖᒃᑯᐊ ᐊᖑᓇᓱᒃᓂᐅᔪᑦ ᐱᔭᐅᖃᑦᑕᓚᐅᕐᑐᑦ ᑭᓯᐊᓂ ᐅᑭᐅᒃᑯᑦ ᓯᑯᖃᓕᕐᑎᓪᓗᒍ. ᐊᓯᖏᑦ ᐱᒋᐊᕐᑎᑕᐅᓯᒪᒃᒥᔪᑦ ᓲᕐᓗ ᓂᐅᕕᕐᖢᑎᒃ ᑐᒃᑐᕐᔪᐊᓂᒃ, ᐊᑯᑭᑦᑐᓂ, ᑐᒃᑐᖃᑦᑎᐊᕈᓐᓃᕐᓂᖓᓄᑦ ᕿᑭᕐᑕᓗᒃᒥᓗ ᑐᒃᑐᑕᕆᐊᖃᕈᓐᓃᕐᓯᒪᑎᓪᓗᒋᑦ.

ᐃᖃᓗᓕᕆᓂᕐᒧᑦ ᑕᕆᐅᕐᒥᓗ ᖃᐅᔨᓴᕐᓂᖅ

ᐊᕋᒍᖓᓂ 2013, ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᕿᓂᑲᑕᓚᐅᕐᑐᑦ ᖃᐅᔨᓴᕐᖢᑎᒃ ᐃᖃᓗᓕᕆᓂᕐᒥᒃ ᓇᑖᕐᓇᓂᒃ ᕿᑭᕐᑕᕐᔪᐊᑦ ᑕᕆᐅᖓᓂ ᐊᒻᒪᓗ ᑲᖏᕐᖢᒃᒥ ᐊᑐᕐᑕᐅᓪᓗᓂ ᑭᕕᐅᖅ. ᑐᕋᒐᖃᓚᐅᕐᑐᑦ ᓇᓗᓇᐃᕐᓯᓇᓱᒃᖢᑎᒃ ᐅᓄᕐᑎᒋᓂᖏᓐᓂᒃ ᓇᑖᕐᓇᐃᑦ ᓄᓇᓕᐅᔪᑦ ᐃᖃᓗᓕᕆᕕᒃᒥ ᐱᒋᐊᕐᑎᑦᑎᓚᐅᕐᓗᑎᒃ ᐃᖃᓗᒐᓱᒃᑎᑦᑎᖃᑦᑕᓕᕐᓗᑎᒃ. ᖃᐅᔨᓴᕐᓂᐅᔪᑦ ᕿᓂᕐᓂᐅᔪᑦ ᑮᓇᐅᔭᖃᕐᑎᑕᐅᓚᐅᕐᑐᖅ ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ, ᑲᓇᑕᒥ ᐅᑭᐅᕐᑕᕐᑐᒥᓗ ᑮᓇᐅᔭᒃᓴᕈᑕᐅᔪᓄᑦ CanNor,ᑲᓇᑕᒥ ᖃᐅᔨᓴᕐᓂᕐᒧᑦ ᑲᑎᒪᔨᖏᑦ National Research Council ᐊᒻᒪᓗ ᒐᕙᒪᒃᑯᑦ ᓄᓇᕗᑦ. ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᖃᐅᔨᓴᕐᓂᖏᑦ ᐱᖃᓯᐅᔾᔨᓚᐅᕐᑐᑦ ᓯᐅᓐᓇᓂᒃ ᑎᓯᔪᓂᒃ ᖄᓕᒃᓂᒃᓗ ᐊᕋᒍᖓᓂ 2014 ᐃᑲᔪᕐᑎᖃᐅᕐᖢᑎᒃᓗ ᖃᐅᔨᓴᕐᑎᐅᔪᓂᒃ ᒥᒧᐊᕆᐅ ᐃᓕᓐᓂᐊᕐᕕᒃᔪᐊᖓᓂᑦ. ᑮᓇᐅᔭᖃᕐᑎᑕᐅᓪᓗᓂ ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ, ᑲᓇᑕᒥ ᐅᑭᐅᕐᑕᕐᑐᒥᓗ ᑮᓇᐅᔭᒃᓴᕈᑕᐅᔪᓄᑦ, CanNor, ᒐᕙᒪᒃᑯᑦ ᓄᓇᕗᑦ ᐊᒻᒪᓗ ᑕᕆᐅᖓᓂ ᐅᑭᐅᕐᑕᕐᑐᒥ ᐱᓕᕆᔩᑦ Oceans North. ᓯᐅᓐᓇᕐᓄᑦ ᐱᓴᓱᒍᑎᓄᑦ ᐱᖓᓲᓂᒃ ᐊᔾᔨᒌᖏᑦᑐᓂᒃ ᑭᖑᑉᐸᒃᓂᒃ ᐊᒻᒪᓗ ᓯᐅᓐᓇᓂᒃ ᐱᖃᑦᑕᓚᐅᕐᑐᑦ.

ᑕᑯᓪᓗᒋᑦ ᐱᔪᒥᓇᕐᓂᕆᔭᖏᑦ, ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᑐᓂᓯᖃᑦᑕᓚᐅᕐᑐᑦ ᐃᖃᓗᒐᓲᑎᓂᒃ ᓄᓇᓕᒃᓄᑦ ᐱᖁᑎᖃᕐᑎᐅᔪᓄᑦ ᐃᓕᓐᓂᐊᕐᑎᑦᑎᓪᓗᑎᒃᓗ ᐊᑐᕐᑕᐅᓂᖏᓐᓂᒃ ᖃᐃᖁᔭᐅᒑᖓᒥ. ᐊᒻᒪᓗᑦᑕᐅᖅ, ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᑲᑎᒪᔨᖏᑦ ᓂᕈᐊᕐᓯᓚᐅᕐᑐᑦ ᑲᔪᓯᖁᔨᓪᓗᑎᒃ ᖃᐅᔨᓴᕐᓂᕐᒥᒃ ᓯᒃᔭᕐᐸᓯᒃᒥ ᑕᕆᐅᕐᒥ ᖃᐅᔨᓴᕐᓂᕐᒥᒃ ᓄᓇᓕᒃᓂ ᑮᓇᐅᔭᒃᓴᐅᑕᐅᔪᓐᓇᕐᑐᓂᒃ ᐱᕙᓪᓕᐊᑎᑦᑎᓂᒃᑯᑦ.

ᑕᐃᒪᐃᑎᓪᓗᒍ, ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᖃᐅᔨᓴᕆᐊᒃᑲᓐᓂᓚᐅᕐᑐᑦ ᐊᕋᒍᖓᓂ 2015. ᐃᑲᔪᕐᑎᒌᒃᑐᑦ ᑕᕆᐅᕐᒥ ᖃᐅᔨᓴᕐᓂᕐᒧᑦ ᐃᓕᓐᓂᐊᕐᕕᒃᔪᐊᕐᒥ, ᐊᒻᒪᓗ ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᑕᕆᕐᒥ ᐃᖃᖓᓂᒃ ᖃᐅᔨᓴᕈᑎᓂᒃ ᐱᒋᐊᕐᓯᒪᔪᑦ. ᕿᓂᕐᖢᑎᒃ ᐃᖃᓗᒐᓱᒃᑕᐅᔪᓐᓇᕐᑐᓂᒃ, ᐃᖃᖓᓂᒃᓗ ᑎᑎᕋᕐᑕᐅᓪᓗᑎᒃ, ᖃᐅᔨᓴᕈᑕᐅᔪᓪᓗ ᐊᒻᒪᓗ ᐃᖃᕐᓂᐊᕈᑎᑦ ᐱᔭᕇᕐᑕᐅᓚᐅᕐᑐᑦ ᐊᐅᔭᒃᑯᑦ ᐃᑲᔪᕐᑕᐅᓪᓗᑎᒃ ᑮᓇᐅᔭᖃᕐᑎᑦᑎᔪᓄᑦ ᐊᒻᒪᓗ ᓇᖕᒥᓂᖅ ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᐃᑲᔫᑎᖏᓐᓂᒃ.

ᐊᕋᒍᖓᓂ 2016, ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᐃᑲᔪᕐᑎᖃᕐᖢᑎᒃ ᓄᓇᕘᒥ ᑕᕆᐅᖓᓂ ᑐᓂᔭᐅᖃᑦᑕᕐᑐᓄᑦ ᑎᒍᒥᐊᕐᓯᐅᔪᑦ ᑲᑐᔾᔨᖃᑎᒌᖏᑦ Nunavut Offshore Allocation Holders Association (NOAHA, ᑕᐃᔭᐅᓕᕐᑐᑦ ᓄᓇᕘᑦ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᖏᑦ Nunavut Fisheries Association), ᐃᒪᒋᔭᐅᓪᓗᑎᒃ ᓄᓇᕘᒥ ᐃᖃᓗᒐᓱᒃᓂᕐᒧᑦ ᐱᓕᕆᔪᓄᑦ. ᑕᐃᒪᐃᓕᐅᕐᑎᓪᓗᑕ, ᐃᒃᐱᒃᓇᐅᑎᔪᑦ ᐊᒻᒪᓗ ᖃᓄᑎᒌᕐᓂᖓ ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᖃᐅᔨᓴᕐᓂᕆᔭᖏᑦ ᐱᖃᓯᐅᔾᔨᓕᓚᐅᕐᑐᑦ ᕿᑭᕐᑖᓗᓕᒫᒥ.

ᓄᓇᕘᑦ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᖏᑦ Nunavut Fisheries Association (NFA) ᖃᐅᔨᓴᕐᓂᕐᒧᑦ ᐊᐅᓚᓂᐅᔪᖅ ᑮᓇᐅᔭᖃᕐᑎᑕᐅᔪᓐᓇᕐᓯᓪᓗᓂ ᐅᓄᕐᑐᓄᑦ ᐊᕋᒍᓄᑦ ᑕᕙᖓᑦ ᑲᓇᑕᒥ ᐅᑭᐅᕐᑕᕐᑐᒥᓗ ᑮᓇᐅᔭᒃᓴᕈᑕᐅᔪᓄᑦ, CanNor. ᑮᓇᐅᔭᖃᕐᑎᑕᐅᓪᓗᓂ ᒐᕙᒪᒃᑯᑦ ᓄᓇᕘᒥ. ᐊᑐᓂ ᐃᓚᒋᔭᐅᔪᑦ ᐃᖃᓗᒐᓱᒃᑎᐅᔪᑦ− ᐱᖃᓯᐅᑎᓪᓗᒍ ᑲᓇᑕᒥ ᐅᑭᐅᕐᑕᕐᑐᒥᓗ ᑮᓇᐅᔭᒃᓴᕈᑕᐅᔪᓄᑦ,− ᑮᓇᐅᔭᑎᒍᑦ ᐃᑲᔪᖃᑦᑕᕐᒥᔪᑦ. ᐊᒻᒪᓗᑦᑕᐅᖅ ᑲᓇᑕᒥ ᐅᑭᐅᕐᑕᕐᑐᒥᓗ ᑮᓇᐅᔭᒃᓴᕈᑕᐅᔪᓄᑦ, ᖃᐅᔨᓴᖃᑕᐅᖏᓐᓇᕐᑐᑦ, ᑭᕕᐅᖅ ᑐᖓᕕᐅᖃᑦᑕᕐᑐᖅ ᖃᐅᔨᓴᕐᓂᕐᒧᑦ ᑕᕆᐅᕐᒥ. ᖃᐅᔨᓴᕐᓂᐅᔪᖅ ᑲᔪᓯᕙᓪᓕᐊᑎᓪᓗᒍ ᐱᖃᓯᐅᑎᓯᒪᔪᑦ ᐅᑯᐊ ᑖᒃᑯᑐᐊᖑᓇᑎᒃᓗ:

• ᐱᑕᖃᐃᓐᓇᕐᑎᑦᑎᓂᕐᒧᑦ ᐱᕙᓪᓕᐊᑎᑦᑎᓂᖅ ᓇᑖᕐᓇᒃᓂᒃ ᐃᖃᓗᒐᓱᕐᓂᕐᒧᑦ (ᓯᒃᔭᕐᐸᓯᒃᒥ ᓴᑦᑎᒃᑐᒥᓗ) ᖃᐅᔨᓴᕈᑎᓄᑦ ᐃᖃᕐᓂᐊᕈᑎᒧᑦ

• ᐃᖃᓗᒐᓱᒃᓂᕐᒧᑦ ᖃᐅᔨᓴᕐᓂᖅ ᐊᒻᒪᓗ ᐱᕙᓪᓕᐊᑎᑦᑎᓂᖅ ᐊᓯᖏᓐᓂᒃ ᐱᑲᑕᖏᓐᓂᕐᓴᐅᓇᓱᒃᓗᑎᒃ ᐊᒻᒪᓗ ᐃᖃᖓᓂᒃ ᓱᕋᐃᖏᓐᓂᕐᓴᐅᓗᑎᒃ

• ᕿᒥᕐᓗᑎᒃ ᐊᒻᒪᓗᐃᖃᓗᒐᓱᒃᑕᐅᕙᓪᓕᐊᔪᓂᒃ (ᓯᒃᔭᕐᐸᓯᒃᒥ ᓴᑦᑎᒃᑐᒥᓗ)

• ᐃᖃᖓ ᑎᑎᕋᕐᑕᐅᕙᓪᓕᐊᓂᖏᑦ

ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᐊᒻᒪᓗ ᓄᓇᕘᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᖏᑦ ᓄᑖᓂᒃ ᖃᐅᔨᓴᐅᔭᕆᐊᓕᒃᓂᒃ ᐱᕙᓪᓕᐊᖃᑦᑕᕐᑐᑦ.

ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒋᖏᑦ ᑮᓇᐅᔭᖃᕐᑎᑦᑎᔪᑦ

ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᐃᑲᔪᕐᑎᖃᕐᖢᑎᒃ ᑳᕈᑕᓐ ᐃᓕᓐᓂᐊᕐᕕᒃᔪᐊᒥ Carleton University, ᓴᕿᑦᑎᓚᐅᕐᑐᑦ ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒋᖏᑦ ᑮᓇᐅᔭᖃᕐᑎᑦᑎᔾᔪᑎ ᐊᕋᒍᖓᓂ 2017. ᐃᓕᓐᓂᐊᕐᑎᑦ ᓄᓇᓕᖏᓐᓂ ᐱᖁᑎᖃᕐᑎᐅᔪᓂ ᐱᓇᓱᒍᓐᓇᕐᑐᑦ ᑮᓇᐅᔭᑎᒍᑦ ᐃᑲᔪᕐᑕᐅᓗᑎᒃ ᐃᓕᓐᓂᐊᕐᕕᒃᔪᐊᒧᐊᕈᒪᔪᓂᒃ ᓄᓇᖃᕐᖄᕐᓯᒪᔪᑦ ᐃᑲᔪᕐᑕᐅᔾᔪᑎᖏᑦ ᐊᐅᓚᑕᐅᔪᒥ(AESP).

ᐊᕋᒍᑕᒫᑦ, ᐊᑐᓂ ᐱᑎᑕᐅᔪᑦ ᓇᓕᐊᒃᓂᑐᐃᓐᓇᖅ ᐱᖁᑎᖃᕐᑎᐅᔪᓂᑦ ᓄᓇᓕᐅᔪᓂᑦ ᑎᓴᒪᓂᑦ ᐃᓕᓐᓂᐊᕆᐊᕈᒪᒃᐸᑕ ᐃᓕᓐᓂᐊᕕᒃᔪᐊᒧᑦ ᑮᓇᐅᔭᖃᕐᑎᑕᐅᔪᓐᓇᕐᑐᑦ. ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᐊᑭᓕᖃᑦᑕᕐᑐᑦ ᐅᑯᓂᖓ:

• ᐃᓕᓐᓂᐊᕈᑎᒃᓴᐃᑦ ᐊᑭᓕᐅᑎᖏᓐᓂᒃ

• ᐊᓯᖏᑦ ᐊᑭᓕᕆᐊᓖᑦ

• ᐊᐅᓚᕈᑎᖏᑦ ᐊᑐᔮᒧᑦ ᐅᑎᒧᓪᓗ

• ᑐᔪᕐᒥᔾᔪᑎᑦ

• ᐃᓅᔾᔪᑎᖏᑦ

ᐃᑲᔫᑕᐅᔪᖅ ᐊᕋᒍᒧᑦ, ᖃᐅᑕᒫᕐᑕᕐᓗᓂ ᐃᓕᓐᓂᐊᑐᖅ ᐃᓕᓐᓂᐊᕕᒃᔪᐊᕈᒪᔪᓄᑦ. ᐱᓗᐊᕐᑐᒥᒃ, ᐃᑲᔪᕐᑐᕐᑕᐅᓗᓂ ᐃᓕᓴᐃᔨᓄᑦ, ᐃᓕᓐᓂᐊᖃᑎᖏᓐᓄᑦ, ᐃᓕᓐᓂᐊᕈᑎᓕᕆᓂᕐᒥᒃ, ᑐᑭᒧᐊᒃᑎᑕᐅᓂᖏᓐᓂᒃᓗ ᐃᓚᐅᖃᑕᐅᔪᑦ ᐱᕙᓪᓕᐊᔪᓕᕆᓂᕐᒧᑦ ᐊᒻᒪᓗ ᓈᒻᒪᖁᑦᑎᓂᕐᒥᒃ, ᑎᑎᕋᕐᓂᕐᒥᒃ, ᐃᓕᓐᓂᐊᕈᑎᖏᓐᓂᒃᓗ ᖁᕙᕐᐸᓪᓕᐊᓂᖏᑦ ᐃᓕᓐᓂᐊᕕᒃᔪᐊᒧᐊᕋᓱᒃᓗᓂ.

ᐃᓚᐅᖃᑕᐅᔪᑦ ᐃᓕᓐᓂᐊᕋᔭᕐᒥᔪᑦ ᓄᓇᖃᕐᖄᕐᓯᒪᔪᑦ ᐃᓕᓐᓂᐊᑕᖏᓐᓂᒃ ᓯᕗᓪᓕᕐᐸᖓᓂ ᐊᕋᒍᒥ ᐊᒻᒪᓗ ᒪᕈᒃᑲᓐᓃᖕᓂᒃ ᐃᓕᓐᓂᐊᕐᑕᐅᒐᔭᕐᑑᒃᓂᒃ ᐃᓕᓐᓂᐊᕐᕕᒃᔪᐊᒥ. ᐃᓕᓐᓂᐊᒃᑲᓐᓂᕐᓗᑎᒃᓗ ᖁᕙᕆᐊᕐᐸᓪᓕᐊᓂᕐᒧᑦ ᐃᓕᓐᓂᐊᕐᕕᒃᔪᐊᒧᑦ ᐱᕙᒋᔭᕐᓂᕐᒧᑦ. ᐊᒻᒪᓗᑦᑕᐅᖅ, ᐊᒃᑐᐊᓂᖃᕆᓪᓗᓂ ᐋᑐᕚᒥ ᓄᓇᖃᕐᖄᕐᓯᒪᔪᓄᑦ ᐅᐸᒃᑕᕐᕕᐅᔪᓄᑦ.

ᐃᓕᓐᓂᐊᕐᑎ ᐱᔭᕇᕐᓯᒍᑎᒃ ᐃᑲᔫᑕᐅᔪᒥᒃ ᐊᕋᒍᒥ ᓯᕗᓪᓕᕐᐹᖓᓂ ᐃᑲᔪᕐᑕᐅᖏᓐᓇᓕᕐᓂᐊᕐᑐᑦ ᑲᒧᓯᒋᐊᒃᑲᓐᓂᕋᓱᒃᑎᓪᓗᒋᑦ ᑲᕈᑕᓐ ᐃᓕᓐᓂᐊᕐᕕᒃᔪᐊᒥ. ᐃᑕᐃᒪᑎᓪᓗᒍ, ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᑮᓇᐅᔭᖃᕐᑎᑦᑎᔪᑦ ᑎᓴᒪᓂᒃ ᐃᓕᓐᓂᐊᕐᑎᐅᔪᓂᒃ ᑐᖏᓕᕇᓂᒃ.

ᑐᑭᓯᒋᐊᒃᑲᓐᓂᕈᒪᒍᕕᑦ ᐃᓕᓐᓂᐊᕐᕕᒃᔪᐊᒧᐊᕋᓱᒃᓗᓂ, ᖃᐅᔨᒋᐊᕐᕕᒋᓗᒍ ᓄᓇᓕᒃᓂ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᔨᐅᔪᖅ ᒫᒃ ᐊᕿᐊᕈᖅ ᐅᕗᖓ 709-578-3278 ᐅᕙᓘᓐᓃᑦ mark@arcticfisheryalliance.com.

ᓄᓇᓕᒃᓂ ᑮᓇᐅᔭᑎᒍᑦ ᐱᕙᓪᓕᐊᑎᑦᑎᓂᖅ ᐊᒻᒪᓗ ᐱᖁᑎᕐᔪᐊᑦ

ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᓴᓂᕐᕙᐃᕙᓪᓕᐊᔪᒥᔪᑦ ᐊᑐᓂ ᓄᓇᓕᐅᔪᑦ ᐱᔪᒪᔭᖏᓐᓂᒃ ᐱᖁᑎᖃᕐᑎᐅᔪᓄᑦ. ᓂᕈᐊᕐᑕᐅᓪᓗᑎᒃ ᐊᖑᓇᓱᒃᑐᓕᕆᔨᒃᑯᓐᓂᑦ ᐊᒻᒪᓗ ᐅᕙᓘᓐᓃᑦ ᕼᐊᒻᓚᒃᑯᓐᓂᑦ (ᒪᐃᔪᑦ ᐸᐸᑦᑎᔨᐅᒃᒪᑕ), ᑖᒃᑯᐊ ᐱᓕᕆᐊᖑᔪᓐᓇᕐᑐᑦ ᐱᔪᒪᔭᖏᓐᓂᒃ ᑐᕌᒐᖏᓐᓂᒃᓗ ᐊᑐᓂ ᓄᓇᓕᐅᔪᑦ ᒪᓕᒃᓗᒋᑦ. ᑐᑭᖃᕐᑐᑦ “ᓄᓇᓕᒃᓄᑦ ᓄᓇᓕᒃᒥᑦ”. ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᐃᑲᔪᕐᑐᐃᖏᓐᓇᕐᑑᒐᓗᐊᑦ ᐱᓕᕆᐊᖑᔪᒪᔪᓂᒃ, ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᑮᓇᐅᔭᑎᒍᑦ ᐃᑲᔪᖃᑦᑕᕐᑐᑦ, ᐊᐅᓚᓂᖏᓐᓂᒃᓗ ᐃᑲᔪᕐᑐᐃᓪᓗᑎᒃᓗ, ᐊᒻᒪᓗ ᐃᖃᓗᓕᕆᓂᕐᒧᑦ ᖃᐅᔨᒪᓂᖏᓐᓄᑦ ᐱᔪᒪᕕᐅᒑᖓᑕ. ᐃᒪᐃᓕᓄᒍᑦ, ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᑐᓂᔭᐅᖃᑦᑕᕐᑐᑦ ᐱᓕᕆᐊᖑᔪᒪᔪᑦ ᕼᐊᒻᓚᒃᑯᓐᓄᑦ ᐊᖑᓇᓱᒃᑐᓕᕆᔨᒃᑯᓐᓄᓪᓗ ᐱᒋᐊᕐᑎᑕᐅᓂᐊᕐᓗᑎᒃ. ᐃᓚᖏᑦ ᐸᕐᓇᐅᑕᐅᕙᓪᓕᐊᔪᑦ ᑲᔪᓯᕙᓪᓕᐊᔪᓪᓗ ᐅᑯᐊ:

• ᐃᑎᔪᒥ ᑐᓚᒃᑕᕐᕕᒃ ᕿᑭᕐᑕᕐᔪᐊᕐᒥ

• ᓂᐅᕈᑎᖃᕐᓂᕐᒥᒃ ᓂᐅᕕᕈᓐᓇᕐᑐᓂᒃᓗ ᐃᖃᓗᒃᓂᒃ ᑎᓱᐊᔪᓂᒃ

• ᓄᓇᓕᒃᓂ ᐅᑭᐅᒃᑯᑦ ᐃᖃᓗᒐᓱᒃᓂᖅ ᓇᑖᕐᓇᓂᒃ ᐱᕙᓪᓕᐊᓂᖓ ᐃᓕᓐᓂᐊᕐᑕᐅᓂᖓᓗ

• ᑮᓇᐅᔭᒃᓴᐅᑕᐅᔪᑦ ᐊᒻᒪᓗ ᑐᕋᒐᖃᕐᓂᖅ ᐳᓚᕋᑦᑐᓕᕆᓂᕐᒥᒃ ᓂᕿᓕᕆᕕᒃᓂᓗ