ᓇᖕᒥᓂᑲᖅᑐᑦ ᐋᖅᑭᐅᒪᓂᖏᑦ
ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᐋᕿᒃᓯᒪᒃᒪᑦ ᑭᒃᓕᖃᕐᑐᒥᒃ ᐃᑲᔪᕐᑎᒌᒃᓂᒃᑯᑦ ᑎᓴᒪᐅᓪᓗᑎᒃ ᐊᖑᓇᓱᒃᑐᓕᕆᔨᒃᑯᑦ ᑲᑎᒪᔨᖏᑦ ᐊᒻᒪᓗ ᑎᓴᒪᐅᓪᓗᑎᒃ ᐸᐸᑦᑎᔩᑦ ᐱᖁᑎᕐᖃᕐᑎᐅᔪᐃᓐᓇᐅᓗᑎᒃ ᐊᔾᔨᒋᒥᒃ. ᐱᖁᑎᖃᕐᑎᐅᓂᖏᑦ ᐃᑲᔫᑎᕚᓪᓕᖁᓪᓗᒍ ᐃᖃᓗᒐᓱᒃᓂᖏᓐᓂᑦ ᓄᓇᕘᑦ ᑕᕆᐅᖓᓂ ᐃᓄᓕᒫᖏᓐᓄᑦ ᐱᔭᐅᔪᓐᓇᖁᓪᓗᒍ ᓄᓇᓕᖏᓐᓂ, ᑎᒍᒥᐊᕐᑎᑐᐃᓐᓇᐅᖏᑦᑐᓄᑦ. ᐊᒻᒪᓗᑦᑕᐅᖅ ᑭᒃᓕᖃᕐᑐᒥᒃ ᐃᑲᔪᕐᑎᒌᖕᓂᖓ ᐄᒃᑲᒪᑖᒃᓯᓄᑦ ᐱᔾᔪᑎᖃᕆᓪᓗᓂ ᑖᒃᓯᔭᐃᖏᓐᓂᕐᓴᐅᖁᓪᓗᒋᑦ ᐃᖃᓗᒐᓱᒃᓂᖓᑕ ᑎᒍᔭᖏᓐᓂᒃ ᑮᓇᐅᔭᓂᒃ, ᐊᒥᐊᒃᑰᔪᑦ ᑮᓇᐅᔭᐃᑦ ᐊᑐᕐᓂᕐᓴᐅᖁᓪᓗᒋᑦ ᐃᖃᓗᒐᓱᒃᓂᕐᒧᑦ ᓄᓇᓕᒃᓂ ᐱᕙᓪᓕᐊᓂᖏᓐᓄᑦ.
ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᐊᐅᓚᑕᐅᓪᓗᑎᒃ ᒪᓕᓯᒃ ᑯᐊᐳᕆᓴᒃᑯᓐᓄᑦ, ᐱᖁᑎᒋᔭᐅᔪᖅ ᑎᓴᒪᐅᓪᓗᑎᒃ ᐊᖑᓇᓱᒃᑐᓕᕆᔨᒃᑯᑦ ᑲᑎᒪᔨᖏᑦ. ᐃᒃᓯᕙᐅᑕᐅᔪᑦ ᐊᑐᓂ ᐊᖑᓇᓱᒃᑐᓕᕆᔨᒃᑯᓐᓂᑦ ᑲᑎᒪᔨᐅᓪᓗᑎᒃ. ᓄᓇᓕᒃᓂ ᐸᐸᑦᑎᔩᑦ ᐃᓂᖃᕐᖢᑎᒃ ᒪᐃᔪᐃᑦ ᓄᓇᓕᐅᔪᓂ ᐊᑐᓂ, ᑲᑎᒪᔨᐅᖃᑕᐅᖏᒃᑲᓗᐊᕐᖢᑎᒃ ᐊᐅᓚᓂᖓᓄᑦ, ᒪᓕᒋᒃᓯᒪᓪᓗᓂ ᑕᐃᒪᐃᑦᑕᕆᐊᖃᕐᓂᖏᓐᓂᒃ ᑮᓇᐅᔭᒃᓴᕐᕕᐅᔪᑦ. ᐊᒻᒪᓗᑦᑕᐅᖅ, ᑮᓇᐅᔭᕐᓴᕈᑎᖓ AFA Inc. ᑮᓇᐅᔭᒃᓴᕐᑎᐅᓪᓗᑎᒃ ᐊᐅᓚᑦᑎᓪᓗᑎᒃ ᐅᑭᐅᕐᑕᕐᑐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᑕᕆᐅᕐᒥ ᖃᐅᔨᓴᕐᓂᕐᒧᑦ ᐊᒻᒪᓗ ᑭᕕᐅᖅ ᐅᑭᐅᒃᑯᑦ ᐃᖃᓗᒐᓱᒃᓂᖏᓐᓂᒃ. ᑮᓇᐅᔭᕐᑖᖑᔪᑦ ᐅᑭᐅᒃᑯᑦ ᐃᖃᕐᒥᐅᑕᓂᒃ ᐃᖃᓗᒐᓱᒃᑎᓪᓗᒋᑦ ᐊᑦᓛᓐᑎᒃ ᑕᕆᐅᖓᓂ ᑲᓇᑕᒥ.
